ریكلام


بەرەو دەوڵەتێکی تۆتالیتار

10/5/2017 2:52:00 PM
ئه‌م بابه‌ته‌‌ : 41 جار بینراوه‌‌

 

که‌مال چۆمانی

 
سەندیکای رۆژنامەنوسانی کوردستان و سەرکردایەتیی سیاسیی کوردستان-عێڕاق لە دو بەیاننامەی هاوشێوەدا جەخت لەوە دەکەنەوە "دژایەتیکردنی سەربەخۆیی و ویستی سەربەخۆخوازانە" روبەڕوی لێپێچینەوەی دادگایییان دەکاتەوە.


سەرکردایەتیی سیاسیی کوردستان-عێڕاق لە خاڵی شەشەمدا دەڵێت: "كۆبوونەوەكە وێڕای دەربڕینی دەستخۆشی و پێزانین بۆ ڕۆڵی دەزگەكانی ڕاگەیاندن كە ڕۆڵێكی باشیان لە پڕۆسەی ڕیفراندۆمدا هەبووە، تەئكیدی لەوە كردەوە كە پێویستە ڕۆڵی ڕاگەیاندنی ناوخۆ لە خزمەت بەرژەوەندیی نەتەوەیی و نیشتیمانیدا بێت و ئامادەبووانی كۆبوونەوەكە لەسەر ئەوە هاوڕا بوون كە پێویستە لە چوارچێوەیەی یاسا سنوورێك بۆ ئەو هەوڵانە دابنرێت كە بە ئاراستەی دژایەتیكردنی مافی گەل و بەرپاكردنی شەڕی دەروونی و پێشێلكردنی سەركەوتنی گەلی كوردستان كار دەكەن."


سەندیکای رۆژنامەنوسانی کوردستانیش لە بەیاننامەکەیدا دەڵێت: "ئه‌نجومه‌نی سه‌ندیكای رۆژنامه‌نووسانی كوردستان: هیچ میدیایه‌كی كوردستانی بۆی نییه‌ ، دژی ویستی سه‌ربه‌خۆخوازی باشوری كوردستان بێت."


ئەمە دەرکەوتەیەکی دیکەی مەترسیدارە کە بە ناوی پاراستنی دەوڵەتی سەربەخۆ و ویستی سەربەخۆخوازانە، دەنگی ناڕازیی و رەخنەگرانە سنورداربکرێت و لەناوببرێت. ئەمە دەرکەوتەیەکی دیکەی رونە کە خەونی دەوڵەتێکی کوردیی دیموکراتیک کە تێیدا ماف و ئازادییەکان پارێزراو بن، خەریکە بە واقیعیی دەبێتە ئامرازێک بە دەستی دەستەڵاتدارانەوە بۆ چەسپاندنی حوکمی پۆلیس و داڕشتنی بناغەی رژێمێکی تۆتالیتار. 


وەستانەوە دژی ئەو ویستە دڵڕەقە فاشیستانە، رزگارکردنی دیموکراسیی و خەڵکی کوردستانە لە بەسعودیەبونی هەرێمی کوردستان.