دەکرێت لە ئێستادا  لەڕێی هێزی سەربازییەوە ناڕەزایەتی و خۆپیشاندانەکان ناو بەناو هێور ببنەوەو  کۆتاییان پێبێت، بەڵام دواجار  بەزویی سەرهەڵ ئەدەنەوە، چونکە ئەزمونی بیست و نۆساڵی حکومڕانی دەسەڵاتی کوردی. پێمان ئەڵێت کە دەسەڵات  بێباکە بەرامبەر بە ژیان و گوزارانی تاک بەتاکی کورد لە کوردستاندا، تەنانەت  ژیانی ئەو هێزانەش کە ئێستا بەرگریان لێ دەکەن،  نابێت دەسەڵاتداران  دڵیان بە ژمارە و قەبارەی ئەو هێزانە خۆشبێت کەئێستا  لەمەیدانەکەدا  ڕۆڵی بەرگری دەگێڕن.

 

دەبێت دەسەڵاتی کوردی لەوە تێبگات ، دواجار ڕۆژێک دێت  بەشێکی گەورە لەم هێزانە بەخۆیاندا دەچنەوە و ئیدی واز لەم بەرگری کردنە لەو  سەروەت و سامانە بەناحەق کۆکراوانەی بەرپرسەکان دەهێنن و لەجێی دۆستایەتی  دەبنەوە دژیان.

 

دەبێت  حکومەتی کوردی کە زۆرینەی لای  هەردو پارتی دەسەڵاتدارە، لەوە تێبگات  ئەوەی زامنی مانەوەیان دەکات، تەنها و تەنها بەخۆدا چونەوە و  ئەنجامدانی چاکسازیی ڕاستەقینەیە، نەک ئەنجامدانی شەڕی دەرونی  دژ بە خەڵک، نابێت ئەم هێزانە بەتەنها  بیر لەپارستانی  گیانی ئەندام و لایەنگرەکانی خۆیان بکەنەوە و  خوێنی ڕۆڵەی خەڵکیان لا کەم بایەخ و بێ ئەرزش بێت،  دەبێت  ئیدی دەسەڵاتی کوردی لەوە تێبگات  ئەوەی دواجار  لەم مەیدانی ململانێیەدا ئەدۆڕێت ئەوانەن کەپێشەنگی ناعەدالەتییان گرتووە، نەک ئەوانەی کەخاوەن هێز و دەسەڵات و پارە و سەروەت و سامانن.

 

ڕوداوەکانی بەهاری عەرەبی  بەئاشکرا ئەوەی پیشانداین مانەوە  تەنها بۆ چینی هەژار و برسی و ماف خوراو بوو کەمیللەت بوو، نەک  ئەو دەسەڵاتەی کە خاوەن  هێزی ناوخۆ و هێزی دەرەکی بو.

 

دەسەڵاتی کوردی دەبێت لەوەتێبگات  ئەو هێزە دەرکیانەی کە لەدەرەوە دەیانپارێزن و تاوەکو ئێستا  بەرگری لەمانەوەیان دەکەن، تائەو جێگەیە لەگەڵیاندا دەمێننەوە  کە میللەت ڕوبەڕویان نابنەوە و دژی ناعەدالەتی و زوڵمو ستەمەکانیان یەک ناگرن.

 

بەچاوی خۆمان بینیمان لەبەهاری عەرەبیدا کاتێک بەشێکی زۆری خەڵکی ناڕازی پێکەوە و بەیەک دەنگ ڕژانە سەرشەقام و داوای نەمانی دەسەڵاتدارانی وڵاتەکانیان دەکرد، چۆن لە کەمترین ماوەدا هێزە دەرەکیەکانیش دەسبەرداریان بون و مافیان دەدا بەگەل کە بۆڕوخاندنی حکومەتەکانیان لەسەرشەقام بمێننەوە و قوربانی بدەن. 

 

ئەو ناعەدالەتیەی کە ئەمڕۆ لە کوردستاندا و لەلایەن دەسەڵاتی کوردیەوە دەبینرێت و بونی هەیە، هیچی کەمتر نییە لەو زوڵم و ستەم و ناعەدالەتییەی کە دەوڵەتانی وەک میسر و یەمەن و لیبیا و تونس و سوریای  پێ ڕوخا و  وێران کرا،  دەبێت  دەسەڵاتی کوردی پێداچونەوەیەک بە سیاسەتی بەڕێوەبردنی خۆیدا  بکات و  پرس و ڕاوێژ بە کەسانی شارەزا و دڵسۆز بکات و پشت لەو ڕاوێژکار و ئەندام و  لایەنگارانەی بکات کە هەمو کارێکیان بووە بەستایش کردن و ماکیاژ کردنی ناشیرینیەکانیان و ئەوەش تەنها لەپێناو  بەدەستهێنانی پلەو پۆست وپارە و دەست خۆشانەیەکی بەرپرسەکانیان،  کەدواجار هەر ئەم ماکیاژکردن و جوانکردنەی ناشیرینیەکانی دەسەڵاتە بوە بە  بەهۆی دروستبونی بۆشایەکی گەورە لەنێوان خەڵک و حکومەتدا و  ئەمەش وای کردووە پاڵنەربێت  بۆ بەرزبونەوەی  ئاستی ناڕەزایەتیەکانی خەڵک و  دروستبونی گردبونەوە و خۆپیشاندان و دواجار دەبێتە هۆی سەرهەڵدانی  ڕاپەڕین.

 

دەبێت دەسەڵاتی کوردی لەوە تێبگات ئەوانەی دەبنە سەرمەشق و ڕابەری  ڕاپەڕینەکان  ئەوانەن کە هیچیان نییە لە دەستی بدەن جگە لەگیانی خۆیان نەبێت، هەر لەم خۆپیشاندانەی ئێستادا  ئەوە بەئاشکرا دەبینین ئەوەی هەڵدەکوتێتە سەر بارەگای حیزبەکان و دار و دیواریان بەسەریەکەوە  دەڕوخێنێت و ئاگریان تێبەردەدات و  سڵ لەگولەی هێزە ئەمنیەکان ناکەنەوە، ئەوگەنج و مێردمنداڵانەن کە نەخاوەنی موچەو  نەخاوەنی کار و نەخاوەنی بڕوانامەو نەخاوەنی ژیانێکی شایستەن و  ئەوانەن کە هیچیان نییە جگە لەڕۆحیان نەبێت کە ئامادەن  ئەویش بکەن بەقوربانی تەنها لەپێناو گۆڕانکاری و لابردنی ئەم هێزە سیایانەوە و دورخستنەوەیان لە کورسی دەسەڵات.