بینراوه
:
لە تۆڕە کۆمەڵایەتیەکان شەیری بکە
شیعری:
سه‌باح عه‌لى جاف
كاتژمێر نۆ ... ... ...
زیڕه‌ى منداڵانى ئاران پاش هه‌فته‌یه‌ك
هه‌فته‌یه‌ك بى قومه شیرێك
هه‌فته‌یه‌ك بێ ئاو، بێ خه‌یار
هه‌فته‌یه‌ك به بێ خه‌رجى رۆژانه
هه‌فته‌یه‌ك بێ ... بێ ... بێ...
قیژه‌ى كیژانى په‌لك ئاڵزكاو
هه‌فته‌یه‌ك بێ برا، باوك، كه‌س وكار
هه‌فته‌یه‌ك دور له كانى و كونه
هه‌فته‌یه‌ك دور له چاوداگرتنى یار
هه‌فته‌یه‌ك بێ ... بێ ... بێ...
نركه و ناڵه‌ى دایكێكى جگه‌ر هه‌ڵقرچاو
هه‌فته‌یه‌ك دور له بێ شیرى بۆ كۆرپه سى شه‌وه‌كه‌ى
هه‌فته‌یه‌ك دوور له جامانه و باخه‌ڵ
هه‌فته‌یه‌ك دوور له شه‌نگه‌بێرى
هه‌فته‌یه‌ك بێ ... بێ ... بێ...
كاتژمێر نۆ ... ... ...
نۆ و تۆزێك لایداوه
لادانێك له لاپاڵى مه‌رگدا
لادانێك كه به ده‌م به‌سراوى هاواره بۆ ژیان
لادانێك بۆ ته‌نها یه‌ك هه‌ناسه، یه‌ك نیگا
لادانێك لایداوه... لایداوه... لایدا..
كاتژمێر نۆ ... ... ...
زیڕه‌كان زیڕه‌یان بڕا
قیژه‌كان قڕ و قپ
نركه‌كان به‌س نوزه‌ن.
كاتژمێر نۆ ... ... ...
كاتژمێر نۆ و توزێك لایداوه
لادانێك سى و یه‌ك ساڵه بێ چركه چرك
لادانێك بوو به ئازار بۆ عاله‌مێك
لادانێك بوو به هاوارى نه‌ته‌وه‌ییه‌ك.
كاتژمێر نۆ ... ... ...نۆ و تۆزێك لایداوه
له بیانى سه‌ماوه سه‌ره سوڕیه‌تى بێ جوڵه
هه‌ر
كاتژمێر نۆ ... ... ... تۆزێك لایداوه و به‌س.
23-7-2019
كه‌لار